`
ဗာတီကန်က တနင်္လာနေ့မှာ ကြေညာချက်ထုတ်ပြန်ရာမှာ ပုပ်ရဟန်းမင်းကြီး ဖရန်စစ်ရဲ့ ကျန်းမာရေးအတွက် စိန့်ပီတာရင်ပြင်မှာ နေ့စဉ် ညနေဆုတောင်းပွဲတွေ ပြုလုပ်သွားမယ်လို့ သိရပါတယ်။
ဗာတီကန်ရဲ့ နံပါတ် ၂ ခေါင်းဆောင် Cardinal Pietro Parolin က ယနေ့ညနေမှာ ပထမဆုံး ဆုတောင်းပွဲကို ဦးဆောင်မှာ ဖြစ်ပါတယ်။
အသက် ၈၈ နှစ်ရှိပြီဖြစ်တဲ့ ပုပ်ရဟန်းမင်းကြီး ဖရန်စစ်ဟာ ရှုပ်ထွေးတဲ့ အဆုတ်ရောဂါကြောင့် ရောမမြို့ရဲ့ Gemelli Hospital မှာ ၁၀ ရက်မြောက် ဆေးကုသမှု ခံယူနေရပြီး ကျောက်ကပ်အားနည်းတဲ့အခြေအနေကို စတင်ခံစားနေရတယ်လို့ သိရပါတယ်။
“ ညက အခြေအနေကောင်းပါတယ်။ ပုပ်ရဟန်းမင်းကြီး အိပ်စက်အနားယူနေပါတယ်” လို့ ဗာတီကန်က တနင်္လာနေ့အစောပိုင်းမှာ ပြောကြားခဲ့ပါတယ်။
ဖရန်စစ်ဟာ တစ်ပတ်ကြာ ချောင်းဆိုးရောဂါပိုဆိုးလာပြီးနောက် ဖေဖော်ဝါရီ ၁၄ ရက်မှာ ဆေးရုံကို တက်ရောက်ခဲ့ပါတယ်။ ဆရာဝန်တွေက ရှုပ်ထွေးတဲ့ ဗိုင်းရပ်စ်၊ ဘက်တီးရီးယားနဲ့ မှိုကြောင့်ဖြစ်တဲ့ အသက်ရှူလမ်းကြောင်းဆိုင်ရာ ရောဂါပိုးဝင်တာကို ဦးစွာရှာဖွေတွေ့ရှိခဲ့ပြီး နောက်ပိုင်းမှာ အဆုတ်နှစ်ဖက်စလုံးမှာ နမိုးနီးယားရောဂါ စတင်ဖြစ်ပွားတာကို တွေ့ရှိခဲ့ပါတယ်။
တနင်္ဂနွေနေ့နှောင်းပိုင်းမှာ ဆရာဝန်တွေက သွေးစစ်ဆေးမှုတွေအရ “ အစောပိုင်း၊ အနည်းငယ် ကျောက်ကပ်အားနည်းတဲ့ အခြေအနေ” ကို တွေ့ရှိခဲ့ပေမယ့် ထိန်းချုပ်ထားနိုင်တယ်လို့ ပြောကြားခဲ့ပါတယ်။ ဆရာဝန်တွေက ဖရန်စစ်ဟာ တည်ငြိမ်တဲ့ အခြေအနေမှာရှိနေပြီး စနေနေ့ညနေပိုင်းကစပြီး နောက်ထပ် အသက်ရှူလမ်းကြောင်းဆိုင်ရာ အခက်အခဲတွေ မကြုံတွေ့ခဲ့ဘူးလို့ ဆိုပါတယ်။
Gemelli hospital မှာ Bishop Claudio GiulioDori က စိန့်ဂျွန်ပေါလ် ၂ ဘုရားကျောင်း (St. John Paul II Chapel) မှာ ခံစားချက်ပြင်းထန်တဲ့ လူအပြည့်အလျှံ မစ္ဆားပူဇော်ပွဲကို ဦးဆောင်ကျင်းပခဲ့တယ်လို့ Associated Press က ဖော်ပြထားပါတယ်။
ခန့်မှန်းခြေ လူ ၂၀၀ လောက် တက်ရောက်ခဲ့ကြပြီး အချို့က အဖြူရောင် ဆရာဝန်ဝတ်စုံတွေ ဒါမှမဟုတ် အစိမ်းရောင် ခွဲစိတ်ခန်းသုံးဝတ်စုံတွေကို ဝတ်ဆင်ထားကြတယ်လို့ AP က ဖော်ပြပါတယ်။
“ ကျွန်တော်တို့ စိတ်မကောင်းပါဘူး။ ပုပ်ရဟန်းမင်းကြီး ဖရန်စစ်ဟာ ကောင်းမွန်တဲ့ ပုပ်ရဟန်းမင်းကြီးတစ်ပါးပါ။ သူကောင်းလာမယ်လို့ မျှော်လင့်ပါတယ်။ ကျွန်တော်တို့ မျှော်လင့်ပါတယ်” လို့ တနင်္လာနေ့မှာ Gemelli ဆေးရုံမှာ ဆွေမျိုးတစ်ဦးကို လာရောက်တွေ့ဆုံတဲ့ Filomena Ferraro က AP ကို ပြောကြားခဲ့ပါတယ်။ “ ကျွန်တော်တို့ သူ့အတွက် ဆုတောင်းပေးနေပါတယ်။ ဒါပေမယ့် တခြားဘာလုပ်နိုင်မှာလဲ”
’ Landon Mion နဲ့