ယီမင်နှင့် ဂျီဘူတီနိုင်ငံတို့၏ ရေပြင်တွင် အာဖရိကမှ ရွှေ့ပြောင်းအလုပ်သမားများကို တင်ဆောင်လာသော စက်လှေလေးစင်း တိမ်းမှောက်ခဲ့ရာ လူအနည်းဆုံး နှစ်ဦးသေဆုံးပြီး အခြားလူ ၁၈၆ ဦး ပျောက်ဆုံးနေကြောင်း International Organization for Migration (IOM) မှ သောကြာနေ့တွင် ပြောကြားခဲ့သည်။
ယီမင်နိုင်ငံအနီးတွင် ကြာသပတေးနေ့နှောင်းပိုင်း၌ သင်္ဘောနှစ်စင်းတိမ်းမှောက်ခဲ့ကြောင်း IOM ၏ ပြောရေးဆိုခွင့်ရှိသူ Tamim Eleian က ပြောသည်။ သင်္ဘောသားနှစ်ဦးကို ကယ်ဆယ်နိုင်ခဲ့သော်လည်း သင်္ဘောသား ၁၈၁ ဦးနှင့် ယီမင်သင်္ဘောသားငါးဦးမှာ ပျောက်ဆုံးနေဆဲဖြစ်ကြောင်း Associated Press သို့ပြောကြားခဲ့သည်။
အလားတူအချိန်တွင်ပင် ဂျီဘူတီနိုင်ငံအနီးတွင်လည်း အခြားသင်္ဘောနှစ်စင်း တိမ်းမှောက်ခဲ့ကြောင်း ၎င်းကဆိုသည်။ ရွှေ့ပြောင်းအလုပ်သမားနှစ်ဦး၏ ရုပ်အလောင်းများကို ရှာဖွေတွေ့ရှိခဲ့ပြီး ကျန်သူအားလုံးကို ကယ်တင်နိုင်ခဲ့သည်။
လေပြင်းများ တိုက်ခတ်မှုကြောင့် ဂျီဘူတီကမ်းခြေအနီးတွင် သင်္ဘောနှစ်စင်း တိမ်းမှောက်ခဲ့ခြင်းဖြစ်ကြောင်း IOM ၏ ယီမင်နိုင်ငံဆိုင်ရာ မစ်ရှင်အကြီးအကဲ Abdusattor Esoev က AP သို့ပြောကြားခဲ့သည်။
တတိယမြောက်သင်္ဘောသည် တာအစ်ဇ်ပြည်နယ်၊ ဒါဘတ်ခရိုင်အနီးတွင် တိမ်းမှောက်ခဲ့ပြီး အီသီယိုးပီးယားရွှေ့ပြောင်းအလုပ်သမား ၃၁ ဦးနှင့် ယီမင်သင်္ဘောသားသုံးဦးကို တင်ဆောင်လာခြင်းဖြစ်သည်။
စတုတ္ထမြောက်သင်္ဘောသည်လည်း အလားတူနေရာအနီးတွင် တိမ်းမှောက်ခဲ့ပြီး အဘီယန်ပြည်နယ်ရှိ အာဝါခရိုင်သို့ ဦးတည်ကာ အီသီယိုးပီးယားရွှေ့ပြောင်းအလုပ်သမား ၁၅၀ ဦးနှင့် ယီမင်သင်္ဘောသားလေးဦးကို တင်ဆောင်လာခြင်းဖြစ်သည်။
ယီမင်နိုင်ငံသည် အရှေ့အာဖရိကနှင့် အာဖရိကဟွန်းဒေသမှ ရွှေ့ပြောင်းအလုပ်သမားများအတွက် အဓိကလမ်းကြောင်းတစ်ခုဖြစ်ပြီး အလုပ်လုပ်ရန်အတွက် ပါရှန်ပင်လယ်ကွေ့နိုင်ငံများသို့ နှစ်စဉ် ရာနှင့်ချီသောလူဦးရေ ရောက်ရှိရန် ကြိုးစားနေကြသည်။ ယီမင်နိုင်ငံသို့ရောက်ရှိရန် ရွှေ့ပြောင်းအလုပ်သမားများသည် မှောင်ခိုသမားများ၏ အန္တရာယ်များသော၊ လူဦးရေပြည့်နှက်နေသည့် သင်္ဘောများဖြင့် ပင်လယ်နီ သို့မဟုတ် အေဒင်ပင်လယ်ကွေ့ကို ဖြတ်သန်းကြသည်။
ယီမင်နိုင်ငံသို့ ရောက်ရှိသူအရေအတွက်သည် ၂၀၂၁ ခုနှစ်ထက် သုံးဆပိုများပြီး ၂၀၂၃ ခုနှစ်တွင် ၉၇,၂၀၀ ဦးအထိရှိခဲ့သည်။ ယခုလအတွင်းထုတ်ပြန်ခဲ့သော IOM ၏ အစီရင်ခံစာအရ ရေပြင်ကို ပိုမိုကင်းလှည့်စောင့်ကြည့်မှုများကြောင့် ယမန်နှစ်က ၆၁,၀၀၀ အောက်သာရှိခဲ့သည်။
လွန်ခဲ့သော ဆယ်စုနှစ်အတွင်း ရွှေ့ပြောင်းအလုပ်သမားအနည်းဆုံး ၂,၀၈၂ ဦးမှာ ပျောက်ဆုံးခဲ့ပြီး ၎င်းတို့အထဲမှ ၆၉၃ ဦးမှာ ရေနစ်သေဆုံးကြောင်း သိရသည်ဟု IOM ကဆိုသည်။ ယခုလက်ရှိတွင် ရွှေ့ပြောင်းအလုပ်သမား ၃၈၀,၀၀၀ ခန့်သည် ယီမင်နိုင်ငံတွင် ရှိနေကြသည်။